Արեւագալի Ժամերգութիւն Ս. Կարապետ Մայր Եկեղեցւոյ Մէջ – Ազգ. Առաջնորդարանի Տիկնանց Օժանդակ Մարմնի Մեծ Պահոց Ճաշկերոյթ


Չորեքշաբթի, 17 Փետրուար 2016-ին, Հոլիվուտի Ս. Կարապետ Մայր Եկեղեցւոյ մէջ, նախագահութեամբ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի եւ մասնակցութեամբ Բերիոյ Թեմի Առաջնորդ Բարձր. Տ. Շահան Արք. Սարգիսեանի, տեղի ունեցաւ Արեւագալի Ժամերգութիւն։ Երգեցողութիւնը կատարեցին եկեղեցւոյ հոգեւոր հովիւ Արժ. Տ. Վիգէն Աւ. Քհնյ. Վասիլեան, սարկաւագներ եւ հաւատացեալ ժողովուրդը:

Արեւագալի «Յարեւելից» եւ «Ճգնաւորք» շարականները ներդաշնակ կերպով երգեցին Ռոզ եւ Ալեք Փիլիպոս Ազգ. Վարժարանի 9րդ կարգի աշակերտները։

Ժամերգութեան աւարտին, Առաջնորդ Սրբազան Հայրը իր օրհնութեան խօսքը ուղղելով, անդրադարձաւ Մեծ Պահոց խորհուրդին, շեշտելով, որ Քրիստոսի Ս. Յարութիւնը կանխող քառասնօրեայ շրջանին, կոչուած ենք ինքնաքննութեամբ եւ ինքնասրբագրութեամբ մարմնապէս եւ հոգեպէս վերանորոգուելու, որպէսզի միասնաբար անգամ մը եւս դիմաւորենք Քրիստոսի յաղթական Ս. Յարութիւնը: Ան բարձր գնահատեց աշակերտները, որոնք գեղեցկօրէն երգեցին շարականները, ապա ներկայացուց Բերիոյ Թեմի Առաջնորդ Շահան Սրբազանը, նշելով, որ ան մեր Թեմը կ’այցելէ 21 Փետրուարին նախատեսուած թելեթոնին առիթով, եւ հրաւիրեց հիւր սրբազանը, որպէսզի արտասանէ իր սրտի խօսքը:

Շահան Սրբազան նախ շնորհակալութիւն յայտնեց Առաջնորդ Սրբազան Հօր, գնահատեց աշակերտներն ու հաւատացեալները, ապա շեշտը դրաւ մեր կեանքին մէջ աղօթքի կարեւորութեան եւ անհրաժեշտութեան վրայ։ Ան նշեց, որ Արեւագալի ժամերգութիւնը իբրեւ փառաբանութիւն ուղղուած է Քրիստոսի, եւ կը մարմնաւորէ իսկական լոյսի պաշտամունքը. ան յորդորեց հաւատացեալները, որ աղօթեն, որպէսզի այդ լոյսը առաջնորդէ մեզ դէպի Աստուած: Ան հրաւէր ուղղեց որ աղօթենք մասնաւորաբար Սուրիոյ ժողովուրդին ու այդ երկրի մեր հայ հարազատներուն համար, երբ այս օրերուն պատերազմ է, ելեկտրականութիւն չկայ, ջուր չկայ, եւ ամէն տեսակի նիւթական դժուարութիւն կայ, սակայն հաւատքի լոյսը առկայծ կը մնայ։ Ան թելադրեց աղօթելու՝ որ ժողովուրդը երբ այլ բաներ կորսնցուցած է, յոյսը չկորսցնէ։

ՄԵԾ ՊԱՀՔԻ ՃԱՇԿԵՐՈՅԹ Արարողութենէն ետք, եկեղեցւոյ «Կարապետեան» սրահին մէջ, Ազգ. Առաջնորդարանի Տիկնանց Օժանդակ Մարմինին կազմակերպութեամբ տեղի ունեցաւ Մեծ Պահոց ճաշկերոյթը: Ներկայ էին հիւրընկալ Մարմինին, մեր եկեղեցիներու տիկնանց միութիւններու եւ ՀՕՄ-ի անդամներ:

Բարի գալուստի խօսք արտասանեց Տ. Օ. Մարմինի անդամ Տիկին Վարդուկ Աւետիքեան: Սեղանի օրհնութենէն ետք, Առաջնորդ Սրբազանը ողջունեց ներկաները, մասնաւորաբար մեր եկեղեցիներու տիկնանց միութիւններու, ՀՕՄի Շրջանային Վարչութեան եւ մասնաճիւղերու անդամներու ներկայութիւնը եւ գնահատանք յայտնեց Տ. Օ. Մարմինին, որ այս սիրոյ ճաշը կազմակերպած էր։ Սրբազան Հայրը նաեւ բարի կեցութիւն մաղթեց Շահան Սրբազանին: Ապա, հրաւիրեց Տ. Վիգէն Աւ. Քահանան, որպէսզի խօսի Մեծ Պահքի խորհուրդին մասին: Տէր Հայրը ամփոփ ձեւով խօսեցաւ պահեցողութեան ու անկէ բխող թելադրանքներուն մասին, յաջողութիւն մաղթեց բոլորին եւ կոչ ուղղեց առատաձեռնօրէն մասնակցելու Սուրիոյ Հայութեան Օժանդակութեան Միացեալ Մարմինի կազմակերպած թելեթոնին, որ տեղի պիտի ունենայ Կիրակի, Փետրուար 21։

Ձեռնարկի աւանդական մթնոլորտը աւելի ճոխացաւ գեղարուեստական յայտագրով, որուն մասնակցեցան Ռոզ եւ Ալեք Փիլիպոս Ազգային Վարժարանի աշակերտներէն խումբ մը արտասանութեամբ, պարով եւ երգով, որոնք յաջորդաբար ներկայացուեցան Վարժարանի ուսուցչուհիներէն՝ Տիկին Սոնա Մատարեանի կողմէ։ Աշակերտներուն ներկայացումները իրենց կոկիկ ելոյթով մեծապէս խանդավառեցին ներկաները, եւ գնահատուեցան բոլոր ներկաներու ծափողջոյններով։

Ապա, իր կարգին, սրտի խօսք արտասանեց Բերիոյ Թեմի հիւր Առաջնորդը։ Շահան Սրբազանը շնորհակալութիւն յայտնեց Արեւմտեան մեր Թեմի ժողովուրդին, որ օժանդակութեան ձեռք կÿերկարէ Սուրիոյ հայութեան։ Ան տեղեկութիւններ հաղորդեց Սուրիոյ իրավիճակին մասին եւ կոչ ուղղեց օժանդակելու Սուրիոյ մեր հայ քոյրերուն եւ եղբայրներուն։

Ներկաները օրուան խորհուրդներով լիցքաւորուած եւ բարեսրտութեան ոգիով տոգորուած հրաժեշտ տուին իրարու:

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022

ԼՈՒՐԵՐՈՒ ԱՐԽԻՒ