Ազգ. Թաւլեան Մանկամսուրի Աշակերտները Այցելեցին Ազգ. Առաջնորդարան


Փասատինայի Ազգային Լեւոն եւ Յասմիկ Թաւլեան Մանկամսուրի աշակերտները Երեքշաբթի, 15 Մարտ 2016ի առաւօտուն այցելեցին Ազգային Առաջնորդարան եւ իրենց երգերով, արտասանութիւններով եւ ճռուողիւններով՝ գարնանային շունչ մը բերին Ազգի Տան:

Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան հիւրընկալեց աշակերտները, որոնք առաջին հերթին «Ս. Տրդատ եւ Ս. Աշխէն» մատրան մէջ ունեցան աղօթքի պահ մը: Առաջնորդ Սրբազանին կողքին էին Արժ. Տ. Նարեկ Աւ. Քհնյ. Փեհլիվանեան, Տ. Պօղոս Քհնյ. Պալթայեան եւ Տ. Ղեւոնդ Քհնյ. Քիրազեան: Աշակերտները կ’առաջնորդուէին մանկամսուրի վարիչուհիին՝ Տիկին Հելէն Մանուչարեանի եւ դաստիարակներու կողմէ, ընկերակցութեամբ խումբ մը ծնողներու:

Տէրունական աղօթքէն եւ «Յարեւելից» շարականէն ետք, աշակերտները անցան «Տիգրան եւ Զարուհի Տէր Ղազարեան» սրահը, ուր Առաջնորդ Սրբազանին, հոգեւոր հայրերուն եւ ծնողներուն ներկայացուցին կոկիկ յայտագիր մը. երգերն ու արտասանութիւնները կ’աւետէին գարունը, Զատիկը, արձագանգ էին Հայաստանի եւ հայերէն գիրերու հանդէպ սիրոյն:

Առաջնորդ Սրբազանը ուրախութիւն արտայայտեց մանուկներուն գեղեցիկ ներկայացումին մասին, օրհնեց բոլորը եւ կարճ զրոյց մը ունեցաւ անոնց հետ, վեր առնելով զատկական աւանդութիւնները:

Այնուհետեւ, դեռատի մանուկները այցելեցին Ազգ. Առաջնորդարանի բաժանմունքները, ապա, համախմբուեցան «Սիւլահեան» դահլիճին մէջ, ուր Առաջնորդ Սրբազանին հետ ունեցան հաճելի զրոյց. անոնք բացատրեցին, թէ ի՞նչ կ’ուզեն ըլլալ, երբ մեծնան, իսկ ամէնէն կարեւորը, խոստացան ըլլալ հաւատարիմ հայ քրիստոնեաներ:

Իբրեւ յուշանուէր, մանուկները ստացան սրբանկարներ եւ պատկերաւոր պատմութիւններ, իսկ ուսուցիչներն ու ծնողները ստացան Տէրունական Աղօթքէն գեղատիպ օրինակներ:

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022