Շաբաթական Լուրեր – 9 Մայիս 2014

ՔԱԼԻՖՈՐՆԻՈՅ ԽՈՐՀՐԴԱՐԱՆԸ ԿԸ ՃԱՆՉՆԱՅ ԱՐՑԱԽԻ ԱՆԿԱԽՈՒԹԻՒՆԸ

AssemblyArtsakh1Գոհունակ սրտով մեր խնդակցութիւնը կը յայտնենք, որ Քալիֆորնիոյ Նահանգային Խորհրդարանը Հինգշաբթի, 8 Մայիսին, պատմակշիռ քայլ մը առաւ Արցախի անկախութեան միջազգային ճանաչման ուղղութեամբ՝ 70 թեր եւ 1 դէմ քուէով վաւերացնելով Լեռնային Ղարաբաղի Հանրապետութեան ժողովուրդի ինքնորոշման իրաւունքը ճանչցող AJR-32 բանաձեւը:

Քալիֆորնիոյ օրէնսդիր մարմինը նաեւ որոշեց իր բանաձեւը յղել Ամերիկայի Միացեալ Նահանգներու Քոնկրեսին եւ նախագահին՝ դիմելով անոնց, որ իրենց կարգին նպաստեն Արցախի ժողովուրդի ինքնորոշման իրաւունքի ճանաչման:

Այս պատմական առիթով, Առաջնորդ Սրբազանն ու Ազգ. Առաջնորդարանի մեծ ընտանիքը երախտագիտութիւն կը յայտնեն Խորհրդարանի անդամներուն իրենց կայացուցած արդար որոշումին համար եւ շնորհակալութիւն կը յայտնեն Հայ Դատի Յանձնախումբի անդամներուն իրենց տքնաջան ճիգերուն համար։

***

ԱՌԱՋՆՈՐԴ ՍՐԲԱԶԱՆԸ ՊԻՏԻ ՀԱՆԴԻՍԱՊԵՏԷ
ԷՆՍԻՆՈՅԻ Ս. ՆԱՀԱՏԱԿԱՑ ԵԿԵՂԵՑՒՈՅ Ս. ՊԱՏԱՐԱԳԻՆ

Կիրակի, 11 Մայիսը Ս. Յարութեան տօնին յաջորդող չորրորդ Կիրակին է, որ կը կոչուի Կարմիր Կիրակի։

Առաջնորդ Սրբազանը պիտի հանդիսապետէ Էնսինոյի Սրբոց Նահատակաց եկեղեցւոյ Ս. Պատարագին եւ պիտի փոխանցէ իր պատգամը։

***

ԱԶԳԱՅԻՆ ԵՐԵՍՓՈԽԱՆԱԿԱՆ ԺՈՂՈՎԻ 42-ՐԴ ՆՍՏԱՇՐՋԱՆԸ
16 ՄԱՅԻՍ ԵՒ 17 ՄԱՅԻՍԻՆ

Յառաջիկայ շաբաթավերջին, Ուրբաթ, Մայիս 16-ին եւ Շաբաթ, Մայիս 17-ին, Արեւմտեան մեր Թեմի Ազգ. Երեսփոխանական Ժողովի 42-րդ նստաշրջանը պիտի գումարուի Ազգ. Առաջնորդարանի յարկին տակ, նախագահութեամբ Առաջնորդ Սրբազան Հօր։

Օրակարգի վրայ են մեր եկեղեցիներու, վարժարաններու եւ առհասարակ ազգային կեանքի տարբեր կալուածներուն մէջ տարուող աշխատանքներուն ընթացքն ու արդիւնքը: Ժողովը պիտի քննարկէ Առաջնորդ Սրբազանին, Կրօնական Ժողովին ու Ազգ. Վարչութեան միամեայ գործունէութեան տեղեկագիրները, եւ պիտի մշակէ յառաջիկայ տարուան աշխատանքներուն գլխաւոր գիծերը։

Տեղի պիտի ունենայ նաեւ Կրօնական Ժողովի եւ Ազգ. Վարչութեան ընտրութիւն։

Ազգային Երեսփոխանական Ժողովի նախօրեակին, Չորեքշաբթի, 14 Մայիսին, Կլենտէյլի Ս. Աստուածածին եկեղեցւոյ յարկին տակ, տեղի պիտի ունենայ հոգեւորականաց համագումար, նախագահութեամբ Առաջնորդ Սրբազան Հօր ու մասնակցութեամբ հոգեւորականաց դասու անդամներուն։

***

CASPS-Ի ՀԱՆԴԻՍՈՒԹԻՒՆ Ի ՊԱՏԻՒ
ԿԼԵՆՏԷՅԼԻ ՅԱՋՈՂԱԿ ՀԱՅ ՇՐՋԱՆԱՒԱՐՏՆԵՐՈՒ

CASPSGlendale1Հանրային Վարժարաններու հայ աշակերտներու դպրոցական կեանքին հետեւող CASPS յանձնախումբը, Հինգշաբթի, 8 Մայիսի յետմիջօրէին կազմակերպած էր հանդիսութիւն մը որ նուիրուած էր Կլենտէյլի հանրային վարժարաններէ շրջանաւարտ յաջողակ աշակերտներուն:

CASPS-ը, 18-րդ տարին ըլլալով, Կլենտէյլի մէջ կը կազմակերպէ այս ձեռնարկը. այս տարի, գնահատանքի արժանացան աւելի քան 200 աշակերտներ, իրենց արձանագրած յաջողութիւններուն համար։

Առաջնորդ Սրբազան Հօր հովանաւորութիւնն ու ներկայութիւնը վայելող ձեռնարկը տեղի ունեցաւ Կլենտէյլի Adult Recreation կեդրոնին մէջ։ Ձեռնարկին ներկայ էր Ազգային Վարչութեան ատենապետուհի Տիկին Ռիմա Պօղոսեան, ինչպէս նաեւ ներկայացուցչական դէմքեր եւ ծնողներ։

***

ՀԱՅԱՍՏԱՆ ՀԱՄԱՀԱՅԿԱԿԱՆ ՀԻՄՆԱԴՐԱՄԻ ՅԱՏՈՒԿ ԸՆԴՈՒՆԵԼՈՒԹԻՒՆ

Նախաձեռնութեամբ Հայաստան Համահայկական Հիմնադրամի, Երեքշաբթի, 6 Մայիսի երեկոյեան, Կլենտէյլի Brandview ճաշասրահին մէջ յատուկ ընդունելութիւն մը տեղի ունեցաւ, որու ընթացքին Արցախի վիճակահանութեան արդիւնքները յայտարարուեցան ու նուէրները յանձնուեցան, ինչպէս նաեւ տեղեկութիւններ փոխանցուեցան Արցախի ապագայի աշխատանքներուն մասին։

Ձեռնարկին ներկայ էին Միացեալ Նահանգներու Արցախի ներկայացուցիչ Տիար Ռոպէրթ Աւետիսեան, գաղութիս մէջ գործող միութեանց ու կազմակերպութեանց ներկայացուցիչներ եւ հրաւիրեալներ։

Յանուն Առաջնորդ Սրբազան Հօր, Արժ. Տ. Խորէն Քհնյ. Պապօշեան ներկայ եղաւ ձեռնարկին, կատարեց սեղաններու օրհնութիւնը եւ փոխանցեց Առաջնորդ Սրբազանին յաջողութեան մաղթանքները։

***

“ՐԱՖՖԻ” ՄՇԱԿՈՒԹԱՅԻՆ ԸՆԿԵՐԱԿՑՈՒԹԻՒՆԸ ՏՕՆԵՑ ԻՐ 50-ԱՄԵԱԿԸ

RaffiAssociationLogoՇաբաթ 3 Մայիսի երեկոյեան, Ռումանահայ “Րաֆֆի” Մշակութային Ընկերակցութեան 50-ամեակի տօնակատարութիւնը տեղի ունեցաւ Beverly Hills մէջ։

Յանուն Առաջնորդ Սրբազան Հօր, Արժ. Տ. Վիգէն Աւ. Քհնյ. Վասիլեան ներկայ եղաւ ձեռնարկին։

Ընդառաջելով ընկերակցութեան խնդրանքին, Առաջնորդ Սրբազանը խնդրամատոյց եղաւ Ն.Ս.Օ.Տ.Տ. Արամ Ա. Կաթողիկոսին որպէսզի Հայրապետական Օրհնութեան Գիրով գնահատէ Ռումանահայ “Րաֆֆի” Մշակութային Ընկերակցութեան 50-ամեայ գործունէութիւնն ու անոր նուիրեալ ծառայողները։

Վեհափառ Հայրապետը իր Օրհնութեան Գիրին մէջ հետեւեալ գնահատանքը տուաւ.-

“Ընկերակցութեան կէս դարու գործունէութիւնը լաւագոյն վկայութիւնն է այն մեղուաջան աշխատանքնին, որուն բարիքները վայելեցին, ու կը շարունակեն վայելել, շրջանի ազգային-եկեղեցական կառոյցները, կրթական հաստատութիւններն ու մարզական թէ մշակութային միութիւնները։ Հեռաւոր Ամերիկայի ափերուն կատարուած բազմակողմանի աշխատանքներու կողքին, Ընկերակցութիւնը ունեցաւ նաեւ հայրենանուէր գործունէութիւն, միանգամայն հետամուտ ըլլալով մեր ժողովուրդի ազգային ժառանգութեան անվթար պահպանման”։

Իսկ Առաջնորդ Սրբազանը իր օրհնութեան եւ գնահատանքի խօսքին մէջ վկայեց.-

“Սփիւռքի այս հեռաւոր ու բազմերանգ ընկերութեան հոսանքներուն մէջ, ամեակներ կերտելը հեշտ ուղի մը չէ, զոր “Րաֆֆի”ն քալեց, զայն բեղմնաւորելով ու երախտարժան՝ մշակութային ու մարմնակրթական գործունէութեամբ հարստացնելով մեր դարաւոր ժառանգութիւնները։ Մարմնակրթական ծիրին մէջ իր տարած գործունէութենէն անկախ, յատկապէս գնահատելի է Ազգային Ֆերահեան Վարժարանի, Ս. Կարապետ Հայց. Առաք. Եկեղեցւոյ եւ անոր կողքին կանգնած Ռոզ եւ Ալեքս Փիլիպոս Վարժարանի հիմնադրութեանց ու Համազգայինի “Գուսան” երգչախումբի կազմութեան ծիրին մէջ Ընկերակցութեան հիմնական ներդրումը”։

***

ՀԱՅԿԱԿԱՆ ՈՍԿՐԱԾՈՒԾԻ ՀԻՄՆԱՐԿՈՒԹԵԱՆ ՏԱՐԵԿԱՆ ՔԱՅԼԱՐՇԱՒ

ABMDRWalkՇաբաթ, 3 Մայիսին, տեղի ունեցաւ Հայկական Ոսկրածուծի Հիմնարկութեան 9-րդ տարեկան քայլարշաւը, Կլենտէյլի մէջ։

Յանուն Առաջնորդ Սրբազան Հօր, Արժ. Տ. Վազգէն Քհնյ. Աթմաճեան մասնակցեցաւ քայլարշաւին եւ փոխանցեց Սրբազանին օրհնութեան խօսքը։

***

ՀՕՄ-Ի ԱՐԵՒՄՏԵԱՆ ՇՐՋԱՆԻ 30-ԱՄԵԱԿԻ ՃԱՇԿԵՐՈՅԹ

ARS30thGalaՈւրբաթ, 2 Մայիսի երեկոյեան, ՀՕՄ-ի Արեւմտեան Շրջանի Շրջանային Վարչութեան 30-ամեակի ճաշկերոյթը տեղի ունեցաւ “Տաղլեան” սրահին մէջ, Հոլիվուտ։

Յանուն Առաջնորդ Սրբազան Հօր, Արժ. Տ. Արտակ Քհնյ. Տէմիրճեան ներկայ եղաւ ձեռնարկին, կատարեց բացման աղօթքը եւ փոխանցեց Առաջնորդ Սրբազանին օրհնութեան խօսքը։

***

Print Friendly, PDF & Email

ՎԵՐՋԻՆ ԼՈՒՐԵՐ

Առաջնորդ Սրբազան Հօր Ս. Զատկուան Պատգամը

ԱՄԵՆԱԼՈ՜ՅՍ ՊԱՅԾԱՌ ԿԻՐԱԿԻՆ Կիրակիները, արեգակնային դրութեան ճշգրտութեամբ, կը յաջորդեն իրարու: Բայց Կիրակին այն, որուն կը սպասեն երկիր ու մարդկութիւն, Կիրակին,... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

August 7, 2022 July 31, 2022