ԿԼԵՆՏԷՅԼԻ Ս. ԱՍՏՈՒԱԾԱԾԻՆ ԵԿԵՂԵՑՒՈՅ 40-ԱՄԵԱԿԻ ՏՕՆԱԽՄԲՈՒԹԻՒՆ
Կլենտէյլի Ս. Աստուածածին եկեղեցին այս շաբաթավերջին կը տօնախմբէ իր հիմնադրութեան 40րդ տարեդարձը:
Այս առիթով, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Կիրակի, 15 Նոյեմբեր 2015ին, Ս. Պատարագ պիտի մատուցէ Ս. Աստուածածին եկեղեցւոյ մէջ եւ պիտի ուղղէ իր պատգամը: Ս. Պատարագի ընթացքին, Առաջնորդ Սրբազանը օրհնութիւնն ու օծումը պիտի կատարէ երեք մեծ խաչերու, որոնք պիտի տեղադրուին եկեղեցւոյ 3 գագաթներուն վրայ։
Շաբաթ, 14 Նոյեմբերի երեկոյեան, եկեղեցւոյ Հովիւներուն, Հոգաբարձութեան եւ 40-ամեակի յանձնախումբի նախաձեռնութեամբ, Կլենտէյլի «Հիլթըն» պանդոկին մէջ տեղի պիտի ունենայ տարեդարձի ճաշկերոյթը, նախագահութեամբ Առաջնորդ Սրբազան Հօր։
***
ՑԵՂԱՍՊԱՆՈՒԹԵԱՆ 100-ԱՄԵԱԿԻՆ ՆՈՒԻՐՈՒԱԾ ՅՈՒՇԱԿՈԹՈՂԻ ԲԱՑՄԱՆ ԱՐԱՐՈՂՈՒԹԻՒՆ ԼԱՍ ՎԵԿԱՍԻ ՄԷՋ
Ընդառաջելով Լաս Վեկասի Հայ-Ամերիկեան Մշակութային Ընկերակցութեան հրաւէրին, Շաբաթ, 14 Նոյեմբեր 2015ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան իր մասնակցութիւնը պիտի բերէ Ցեղասպանութեան 100-ամեակին նուիրուած յուշակոթողի բացման արարողութեան, Sunset Park-ի մէջ, Լաս Վեկաս։
Արարողութեան ներկայ պիտի ըլլան Հայաստանի եւ Լիբանանի պետութեանց ներկայացուցիչներ, քաղաքական եւ կազմակերպութիւններու ներկայացուցիչներ։
Առաջնորդ Սրբազանը Լաս Վեկաս պիտի ժամանէ Ուրբաթ, 13 Նոյեմբերին, եւ ներկայ պիտի ըլլայ համայնքի զաւակներուն ընտանեկան աւանդական երեկոյին:
***