Ուրբաթ, 1 Մարտին, Կլենտէյլի Ս. Աստուածածին եկեղեցւոյ մէջ տեղի պիտի ունենայ Կանանց Համաշխարհային Աղօթքի Օրուան 49-րդ տարեկան հաւաքը, մասնակցութեամբ Հայ Առաքելական, Կաթողիկէ, Աւետարանական, Նազովրեցի եւ Եղբայրակցութեան եկեղեցիները ներկայացնող տիկիններու։
Համաշխարհային Աղօթքի Օրը կը նշուի աւելի քան 170 երկիրներու մէջ։ Այս տարուան խորհրդածութեան թեման է «Եկէ՛ք, ամէն ինչ պատրաստ է արդէն» պատգամը, քաղուած Յիսուսի մեծ խնճոյքին առակէն (Ղուկաս 14:15-24)։
Յայտագիրը կազմուած է աղօթքներով, սաղմոսներու եւ Աւետարանէն հատուածներու ընթերցումներով, հոգեւոր երգերով ու շարականներով, հոգեւոր խորհրդածութիւններով եւ պատգամներով։
Առաջնորդ Սրբազանը, ընկերակցութեամբ հոգեւորականաց դասու անդամներու, մասնակից պիտի ըլլայ արարողութեան եւ պիտի փոխանցէ իր օրհնութեան խօսքը։
Յայտագիրը պիտի սկսի ժամը 11։00-ին. անկէ առաջ, ժամը 9։30-ին, տեղի պիտի ունենայ հիւրասիրութիւն, իսկ ժամը 10:30-ին աղօթքի պահ։