“Տարեցներու Տարուան” Նուիրուած Դասախօսութիւն Ս. Նահատակաց Եկեղեցւոյ Վերջին Արեւագալի Աւանդական Ճաշկերոյթին


Չորեքշաբթի, 9 Ապրիլ 2014ին, Թեմիս բոլոր եկեղեցիներուն մէջ տեղի ունեցաւ Մեծ Պահոց շրջանի վերջին Արեւագալի արարողութիւնը։ Տնօրինութեամբ Թեմիս բարեխնամ Առաջնորդ Բարձր. Տ. Մուշեղ Ս. Արք. Մարտիրոսեանի, Էնսինոյի Ս. Նահատակաց եկեղեցւոյ մէջ, Արեւագալի ժամերգութիւնը եւ հոգեւոր խորհրդածութիւնը կատարեց Հոգշ. Տ. Պօղոս Աբղ. Թինքճեան։  Արարողութեան մասնակցեցան Ֆերահեան Ազգ. Վարժարանի 9-րդ կարգի աշակերտները։

Իր խօսքին մէջ, Հայր Պօղոս անդրադարձաւ Պահքի իմաստին մասին։ Ան ամփոփ կերպով նշեց, թէ իբրեւ քրիստոնեաներ, քառասնօրեայ պահքի շրջանին մեզմէ կը սպասուի մեր գործած մեղքերը ճանչնալ, գիտակցիլ անոնց, զղջալ, ապա  խոստովանանքի եւ ապաշխարհումի ճամբով զանոնք քաւել, որպէսզի Ս. Յարութեան տօնին մաքուր եւ անմեղ հոգիով մօտենանք Ս. Խորանին եւ Աստուծոյ։

Արարողութենէն ետք, “Տիգրանեան” սրահին մէջ տեղի ունեցաւ ճաշի աւանդական հանդիպումը, կազմակերպութեամբ եկեղեցւոյ Տիկնանց Միութեան։ Ճաշի հիւրընկալներն էին  Տէր եւ Տիկին Տիգրան եւ Հուրի Պէրպէրեաններ։

Եկեղեցւոյ հոգեւոր հովիւ Արժ. Տ. Ռազմիկ Քհնյ. Խաչատուրեանի սեղանի օրհնութենէն ետք, Տիկնանց Միութեան ատենապետուհի Տիկին Նէնսի Պետիրեան բարի գալուստ մաղթեց բոլորին։ Ան նախ յատուկ շնորհակալութիւն յայտնեց օրուան հիւրընկալ ամոլին, ինչպէս նաեւ բոլոր նուիրատուներուն, որոնք աջակից են Տիկնանցի աշխատանքներուն՝ իրենց անուրանալի բաժինը բերելով անոնց յաջողութեան։ Տիկին Պետիրեան երախտագիտական խօսքը ուղղեց եկեղեցւոյ հոգեւոր հովիւին, որուն շինիչ խորհուրդներն ու քաջալերանքը մշիչ ուժ կը հանդիսանան իրենց գործոունէութեան եւ Հոգաբարձութեան անդամներուն, որոնց եւս քաջալերանքն ու գնահատանքը կը վայելեն մշատականօրէն։ Վերջապէս տիկին ատենապետուհին շնորհակալութիւն յայտնեց ներկաներուն, որոնց բարոյական եւ նիւթական քաջալերանքին շնորհիւ, սփիւռքի այս հեռաւոր ափերուն, մեր աւանդութիւններն  վառ կը պահուին։

Գեղարուեստական կարճ բաժինով, ներկաները վայելեցին ջութակի մենանուագներ, կատարողութեամբ շրջանի Հայ Ամերիկեան Տարեցներու Միութեան վարչութեան ատենապետ՝ Տիար Սուրէն Գահուէճեանի եւ Ֆերահեան վարժարանի 6-րդ կարգի աշակերտուհի Նանոր Սերայտարեանի։

Այնուհետեւ, Հոգեւոր Հովիւը խօսք առնելով, նախ շնորհակալութիւն յայտնեց Տիար Սուրէն Գահուէճեանին, որ հակառակ իր յառաջացած տարիքին, միշտ պատրաստակամ է եկեղեցւոյ հաւաքոյթները ճոխացնելու մենանուագներով ու տարեցներու միութեան անդամները “նախկին երիտասարդները” որակելու կատակախառն արտայայտութիւններով, նաեւ փոքրիկն Նանորին, որուն “արուեստի նկատմամբ ունեցած սէրը վստահաբար զինք պիտի առաջնորդէ բարձր բեմերու”։

Տ. Ռազմիկ յայտնեց, թէ վերջին Արեւագալի սոյն ճաշկերոյթը աւանդաբար տեղի կþունենայ Առաջնորդ Սրբազան Հօր հովանաւորութեամբ ու ներկայութեամբ, սակայն նկատի ունենալով, որ ան Անթիլիաս կը գտնուի, Տէր Հայրը ներկաներուն փոխանցեց Առաջնորդ Սրբազանին բարեմաղթութիւններն ու օրհնութիւնները։ Ապա գնահատեց Տիկնանց միութեան ժրաջան անդամները, որոնք ատենապետուհի Տիկին Նէնսի Պետիրեանի ղեկավարութեամբ, շօշափելի բաժին կը բերեն Ս. Նահատակաց եկեղեցւոյ աւելի եւս պայծառացման։

Նկատի առած, որ Ն.Ս.Օ.Տ.Տ. Արամ Ա. Կաթիղիկոս 2014-ը հռչակած է »Տարեցներու Տարի«, Տէր Հայրը նշեց,  թէ  Ս. Նահատակաց Եկեղեցին տարիներու սովորութեան վերածած է ամէն տարի սոյն ճաշկերոյթին, Վեհափառին կոչին ուղղուած թեմայով դասախօսութիւն ներկայացնել։ Այսօրուան բանախօսն էր Տիար Կարօ Պետրոսեան։ Ան ամփոփ գիծերու մէջ ներկայացուց օրուան դասախօսը՝ բազմավաստակ ուսուցիչ, դաստիարակ, Մեծի Տանն Կիլիկիոյ Կաթողիկոսութեան կողմէ “Ս. Մեսրոպ Մաշտոց” շքանշանին արժանացած Տիար Կարօ Պետրոսեանը, ու հրաւիրեց զինք “Տարեցներու Տարուան” նուիրուած իր դասախօսութիւնը ներկայացնելու։

Տիար Պետրոսեան հարուստ իր դասախօսութեան մէջ գլխաւորաբար շեշտեց, թէ ՝

– Տարեցները պատուելը մաս կը կազմէ հասարակական կեանքի մշակոյթին եւ քաղաքակրթութեան անգիր այն օրէնքներուն՝ ինչպիսին են նախամեծարումը տիկիններուն եւ օրիորդներուն, կամ մասնաւոր խնամքն ու սէրը մանուկներուն։

– Տարեցը տուած է իր կարելին, սպառած է կենսունակութիւնը, տարած է պայքար, շինած է տուն, որոշ հարստութիւն, ապահոված եւ նպաստած է ոչ միայն ընտանիքի անդամներուն բարեկեցութեան, անոնց բարենպաստ ապագային, այլեւ՝ կարելի սահմաններուն մէջ օգնած է նաեւ մեր մեծ ընտանիքին, որ եկեղեցին է, ազգն է ու հայրենիքը…։

– Մեր տարեցները իւրայատուկ են. անոնք եթէ չտեսան 1915-ի դժոխային օրերու տարիները, բայց անպայման որ ապրեցան անոնց արհաւրալից հետեւանքները, անմարդկային եւ անասելի դառնութիւնները։

   -Կեանքը մեծ մասամբ ապրելէ, բազում փորձառռւթիւններ անցնելէ ետք կեանքի մէջ, ընդհանրական համոզում է , որ անոնք կþօժտուին.

– Խոհեմութեամբ եւ իմաստութեամբ.

– Խաղաղասիրութեամբ ու հաշտութեան ոգիով.

– Հաւատքը առ Աստուած եւ Սէրը մարդուն նկատմամբ, իբրեւ տիեզերական ճշմարտութիւն եւ ճանապարհ ու կեանք։

“Ներկայի մեր տարեցներէն իւրաքանչիւրը՝ ապրող, բայց չգրուած գիրք մըն է, արդի հայոց պատմութիւն, որուն մէջ ինք հերոսն է կամ հերոսուհին, որ բոլոր տեսակի դժուարութիւններէն, ապրած կեանքի ալեկոծութիւններէն ետք՝ դուրս եկած է ճակատը բարձր, պատուաւոր եւ յաղթական։ Առ այդ՝ ինչպէս, որ գիրքը կը նկատուի մարդուն լաւագոյն ընկերը, օգտակար եւ անխարդախ ուղեկիցն ու խորհրդատուն, պէտք է այդպէս ալ ընկալել մեր երէցները եւ հատուցել մեր սրտի պարտքը անոնց նկատմամբ” յայտնեց Տիար Պետրոսեան, որ  եզրափակեց իր խօսքը իրաւունք խնդրելով տարեցներէն երախտագիտութիւն յայտնելու Վեհափառ Հայրապետին իրենց նկատմամբ ուշադրութեան համար. եւ նաեւ շնորհակալութիւն՝ յայտնեց եկեղեցւոյ Հոգեւոր Հովիւին, Հոգաբարձութեան եւ Տիկնանց Օժանդակ Մարմինին այս պահը կազմակերպելուն համար։

Print Friendly, PDF & Email

ՎԵՐՋԻՆ ԼՈՒՐԵՐ

Առաջնորդ Սրբազան Հօր Ս. Զատկուան Պատգամը

ԱՄԵՆԱԼՈ՜ՅՍ ՊԱՅԾԱՌ ԿԻՐԱԿԻՆ Կիրակիները, արեգակնային դրութեան ճշգրտութեամբ, կը յաջորդեն իրարու: Բայց Կիրակին այն, որուն կը սպասեն երկիր ու մարդկութիւն, Կիրակին,... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

June 26, 2022 June 19, 2022