“Տարեցներու Տարին” Նշուեցաւ Ոտնլուայի Արարողութեան Ընդմէջէն


Հայաստանեայց Առաքելական Եկեղեցւոյ զաւակներուն համար, Աւագ Շաբթուան Հինգշաբթի օրը իր բազմախորհուրդ արարողութիւններով ամենէն սրտառուչն է, երբ կը յիշենք մեր Տիրոջ եւ Փրկչին Յիսուսի Քրիստոս երկրաւոր կեանքի վերջին հանգրուանները։

17 Ապրիլ 2014ին, Աւագ Հինգշաբթի առաւօտեան, Թեմիս բոլոր եկեղեցիներուն մէջ Ս. Հաղորդութեան խորհուրդի հաստատման եւ Վերջին Ընթրիքի յիշակատութեան Ս. Պատարագը մատուցուեցաւ։ Թեմիս Բարեխնամ Առաջնորդ Բարձր. Տ. Մուշեղ Ս. Արք. Մարտիրոսեան աղօթակից եղաւ Հոլիվուտի Ս. Կարապետ Մայր Եկեղեցւոյ հաւատացեալներուն հետ։

Յետմիջօրէին, Ոտնլուայի արարողութիւնը կատարուեցաւ, Վերջին Ընթրիքին Յիսուսի կողմէ իր աշակերտներուն ոտքերու լուացման օրինակով եւ ի յուշ անոնց եւ բոլորիս տրուած սիրոյ եւ խոնարհութեան մեծագոյն դասին։

Առաջնորդ Սրբազանը Ոտնլուայի արարողութիւնը կատարեց Էնսինոյի Ս. Նահատակաց Եկեղեցւոյ մէջ։

Այս տարուան արարողութիւնը իւրայատուկ էր։ Թեմիս բոլոր եկեղեցիներուն մէջ, “Տարեցներու Տարուան” ի պատիւ, մեր ծխական շրջաններուն նուիրեալ տարեցներու ոտքերու լուացումը կատարուեցաւ։

Այսպէս, Առաջնորդ Սրբազանը 12 տարեցներու ոտքերը լուաց, որոնց մէջ կային Ազգ. Վարչութեան նախկին անդամներ, երեսփոխաններ, հոգաբարձուներ, բարերարներ եւ ծխականներ։ Տարեցներու լուացումէն ետք, ան լուաց նաեւ Կիրակնօրեայ Վարժարանի աշակերտներու եւ մանուկներու ոտքերը։

Իր պատգամին մէջ, Առաջնորդ Սրբազանը վեր առաւ Յիսուսի փոխանցած սիրոյ եւ խոնարհութեան մեծագոյն դասը, յիշեցնելով որ մերօրեայ կեանքին եւ ծառայութեան մէջ որքան կարօտ ենք սիրոյ եւ խոնարհութեան ոգիով տոգորուելու։ Գնահատելով մեր տարեցները, Առաջնորդ Սրբազանը անոնց յիշեցուց որ տիպար տարեցներու սիրոյ եւ խոնարհութեան օրինակը լաւագոյն գրաւականն է մեր նոր սերունդի առողջ առաջնորդութեան։

Print Friendly, PDF & Email

ՎԵՐՋԻՆ ԼՈՒՐԵՐ

Առաջնորդ Սրբազան Հօր Ս. Զատկուան Պատգամը

ԱՄԵՆԱԼՈ՜ՅՍ ՊԱՅԾԱՌ ԿԻՐԱԿԻՆ Կիրակիները, արեգակնային դրութեան ճշգրտութեամբ, կը յաջորդեն իրարու: Բայց Կիրակին այն, որուն կը սպասեն երկիր ու մարդկութիւն, Կիրակին,... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

August 7, 2022 July 31, 2022