Երեքշաբթի, 27 Ապրիլ 2021ին, Արեւմտեան Թեմի Առաջնորդ՝ Գերշ. Տ. Թորգոմ Ս. Եպս. Տօնոյեան ընդունեց այցելութիւնը Կլենտէյլի մէջ գործող Ազգային «Ռիչըրտ Թիւֆէնքեան» Մանկապարտէզ-մանկամսուրը ներկայացնող պատուիրակութեան մը, գլխաւորութեամբ մանկամսուրի վարիչ Արսինէ Աղազարեանի, որուն կ՛ընկերակցէին Ուսումնական մարմինի ատենապետ Արթին Շահվերտեան, անդամներ եւ Մանկամսուրի վարիչ օգնական Լորէթ Աւաննէսեան: Հանդիպման ներկայ էր նաեւ Մանկամսուր-մանկապարտէզի Ուսումնական մարմինի նախկին ատենապետ, ներկայիս Ազգային վարչութեան անդամ Գեւիկ Պաղտասարեան:
Հանդիպման ընթացքին Մանկամսուրի ներկայացուցիչները Առաջնորդ Սրբազան Հօր փոխանցեցին իրենց ներկայ գործունէութեան, Մանկամսուրի ներքին կեանքի եւ ապագայ ծրագիրներուն մասին տեղեկութիւններ, ապա իրենց ծրագիրներու յաջողութեան համար խնդրեցին Առաջնորդ Սրբազան Հօր զօրակցութիւնը:
Մտերմիկ զրոյցի աւարտին Առաջնորդ Սրբազանը բարձր գնահատեց Ազգային «Ռիչըրտ Թիւֆէնքեան» Մանկամսուր-մանկապարտէզի տնօրէնութիւնը, անձնակազմը, պաշտօնէութիւնն ու պատասխանատուները եւ իր աջակցութիւնը յայտնեց հետագայ ծրագիրներուն՝ միաժամանակ դրուատելով նուիրական այն աշխատանքը, որ այս հաստատութիւնը գրեթէ կէս դարէ ի վեր կը տանի՝ յանուն հայ մատղաշ նոր սերունդներու առողջ ու ապահով կեցութեան եւ հայեցի դաստիարակութեան:
