Երեքշաբթի, 2 Յունուար 2024-ի առաւօտեան, Արեւմտեան Թեմի Առաջնորդ՝ Գերշ. Տ. Թորգոմ Ս. Եպս. Տօնոյեան, Ս. Ծննդեան տօնին ընդառաջ, ընկերակցութեամբ Հոգեւորականաց դասուն, այցելեց Միշըն Հիլզի «Արարատ Հոմ» տարեցներու տունը, ուր Ծննդեան խորհուրդին ընդմէջէն անհատնում առողջութիւն, արեւշատութիւն եւ երջանիկ կեցութիւն մաղթեց հայ մամիկ-պապիկներուն:
Յառաջացած տարիքի բերումով իրենց հանգիստի տարիները հայաշունչ այս տան մէջ անցընող սիրելի հայ ծնողներն ու հարազատները բացառիկ սիրով ու երկիւղածութեամբ ընդունեցին Թորգոմ Եպիսկոպոսի եւ իր շքերթին այցելութիւնը, ապա խանդավառ ապրումներով ականջալուր եղան Առաջնորդ Սրբազանի քաղցր խօսքերուն ու խրախուսիչ մաղթանքներուն՝ միաժամանակ ջերմօրէն լեցուելով Յիսուս Քրիստոսի բարեգութ ներկայութեամբ:
Աւարտին, կառոյցի պատասխանատուներէն Տէրիք Ղուկասեան, հիւանդապահուհիներ եւ պաշտօնէութիւն ջերմ շնորհակալութիւն յայտնեցին Առաջնորդ Սրբազանին, այս այցելութեան առիթով եւ շնորհաւորեցին անոր Ամանորն ու Ս. Ծնունդը՝ մաղթելով նորոգ կորով իր ծառայութեան մէջ:
