Ուրբաթ, 30 Օգոստոս 2024-ի յետմիջօրէին, Արեւմտեան Թեմի Առաջնորդ՝ Գերշ. Տ. Գեղամ Ս. Արք. Խաչերեանի շնորհաւորական այցելութիւն տուին Մոնթեպելլոյի Ս. Խաչ եկեղեցւոյ մէջ Ս. Գրոց սերտողութիւն կատարող եղբ. Գրիգոր Մսըրլեանի Ս. Գրային սերտողութեանց խումբի անդամներ, որոնք շնորհաւորեցին եւ խնդակից դարձան Գեղամ Արքեպիսկոպոսի առաջնորդական ընտրութեան եւ անոր մաղթեցին արեւշատ օրեր. ապա իրենց խումբի գործունէութեան մասին տեղեկութիւններ փոխանցեցին Առաջնորդ Սրբազան Հօր:
Առաջնորդ Սրբազան Հայրը գնահատեց խումբին հոգեւոր գործունէութիւնը շրջանի հայութեան քրիստոնէական կեանքին մէջ՝ դիտել տալով, որ Հայ Եկեղեցւոյ դաստիարակութիւնը մեր ժողովուրդին հոգեբարոյական կերտուածքին մաս կը կազմէ:
