Ուրբաթ, 6 Մարտ 2020-ին, Կանանց Համաշխարհային Աղօթքի Օրուան 50-րդ տարեկան հաւաքը տեղի պիտի ունենայ Լոս Անճելըսի Միացեալ Հայ Աւետարանական եկեղեցւոյ մէջ, մասնակցութեամբ Հայ Առաքելական, Կաթողիկէ, Աւետարանական, Նազովրեցի եւ Եղբայրակցութեան եկեղեցիներու տիկիններու։ Այս տարուան խորհրդածութեան թեման է Յովհաննու Աւետարանի 5-րդ գլուխի 8-րդ համարը՝ «Ե՛լ, մահիճդ առ ու քալէ՛»։
Յայտագիրը կազմուած է աղօթքներով, սաղմոսներով, Աւետարանի ընթերցումներով, հոգեւոր երգերով ու շարականներով, հոգեւոր խորհրդածութիւններով ու պատգամներով։
Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան, ընկերակցութեամբ հոգեւորականաց դասու անդամներու, պիտի մասնակցի արարողութեան եւ պիտի ուղղէ իր օրհնութեան խօսքը։
Առաւօտեան ժամը 10:30-ին տեղի պիտի ունենայ աղօթքի պահ, իսկ յայտագիրը պիտի սկսի ժամը 11։00-ին։ Աւարտին, տեղի պիտի ունենայ հիւրասիրութիւն։
