Միացեալ Նահանգներու Արեւմտեան Թեմի Ազգային Առաջնորդարանի «Յարութ Պարսամեան» Կրթանպաստի Հիմնադրամի յանձնախումբը, գլխաւորութեամբ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի, գոհունակութեամբ կը յայտնէ, թէ քննելէ ետք 2020-2021 տարեշրջանի համար ներկայացուած դիմումնագիրները, որոշած է կրթանպաստի արժանացնել հետեւեալ չորս ուսանողները.- Սառա Այնթապլեան (UCLA), Սեւանա Մանուկեան (UCLA), Մեղեդի Մանոյեան (UCLA) եւ Արմէն Տէմիրճեան (UC Berkeley)։ Անոնք կը հետեւին գիտական մասնագիտութեանց Միացեալ Նահանգներու համալսարաններու մէջ, ձեռք բերած են փայլուն արդիւնքներ եւ համայնքէն ներս ունին գործօն ծառայութիւն։
Յանձնախումբի անդամներն են կրթանպաստի բարերարուհին՝ Տիկին Թամարա Պարսամեան, Դոկտ. Կարօ Յակոբեան եւ Օր. Շաքէ Պօղարեան։
Յաջողութիւն կը մաղթենք մեր ուսանողներուն իրենց ուսումնական ասպարէզին մէջ։
ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
