Շաբաթ, 4 Մարտ 2023-ի երեկոյեան ժամը 7-ին, հովանաւորութեամբ Արեւմտեան Թեմի Առաջնորդ՝ Գերշ. Տ. Թորգոմ Ս. Եպս. Տօնոյեանի, տեղի ունեցաւ Փասատինայի Ազգ. Լ. եւ Յ. Թաւլեան Մանկամսուր-մանկապարտէզի հիմնադրութեան 30-ամեակին նուիրուած տօնախմբութիւն, Noor Event Venue սրահին մէջ, Փասատինա:
Տօնախմբութեան ներկայ եղան Հոգեւոր հայրեր, Ազգ. վարչութեան անդամ Տիար Սարգիս Թաթիկեան, շրջանի մարմիններու եւ կառոյցներու ներկայացուցիչներ, Թաւլեան վարժարանի տնօրէնութիւնը, ուսուցչական կազմը, ծնողներ, բարերարներ, բարեկամներ եւ հիւրեր:
Երեկոյի ընթացքին արտասանուեցան շնորհաւորանքներ եւ սրտի խօսքեր, որոնց ընդմէջէն մեծարուեցաւ Ազգ. Թաւլեան Մանկամսուր-մանկապարտէզի կրթական երեսնամեայ գործունէութիւնն ու դաստիարակ ուսուցիչներու բերած նպաստը հայ-քրիստոնեայ մանուկ աշակերտութեան հայեցի կրթութեան գործին մէջ:
Այս առիթով Առաջնորդ Սրբազանին գնահատանքի յատուկ խօսքը ընթերցեց Հոգշ. Տ. Զարեհ Վրդ. Սարգիսեան:
