Ուրբաթ, 15 Սեպտեմբեր 2023-ի երեկոյեան ժամը 7:30-ին, Արեւմտեան Թեմի Առաջնորդ՝ Գերշ. Տ. Թորգոմ Ս. Եպս. Տօնոյեան այցելեց Հայց. Առաքելական Եկեղեցասիրաց Եղբայրակցութեան կեդրոն, ընկերակցութեամբ Հոգշ. Տ. Զարեհ Վրդ. Սարգիսեանի, Քահանայ հայրերու եւ ընդունուեցաւ Եղբայրակցութեան ներկայացուցիչներու կողմէ, գլխաւորութեամբ ատենապետ Եղբ. Աւօ Կաբակչուզեանի:
Աղօթական երեկոն յատկանշուեցաւ քրիստոնէական հաւատքի ու եղբայրական սիրոյ մէջ խորացմամբ: Ապա, շարականներու երգեցողութեան ներքոյ Առաջնորդ Սրբազանը կատարեց որմնանկարի օծում եւ այս առիթով հնչեցուցած իր պատգամին ընդմէջէն օրհնութիւններ բաշխեց Հայ Եկեղեցւոյ սպասաւորներուն, հայ ազգին ու հայրենիքին, Երկնքի միջամտութիւնը հայցելով՝ աշխարհի վրայ խաղաղութեան հաստատման, այլեւ, Աստուծոյ Գառի՛ն իսկ օրինակով, հայութեան կեանքին մէջ սիրոյ ու եղբայրական վերաբերումի ամրապնդման ու առաւել ուժեղացման համար:
