Հինգշաբթի, 13 Հոկտեմբեր 2022-ի առաւօտեան, Արեւմտեան Թեմի Առաջնորդ՝ Գերշ. Տ. Թորգոմ Ս. Եպս. Տօնոյեան, Ազգ. Առաջնորդարանի մէջ ընդունեց այցելութիւնը Ռամկավար Ազատական կուսակցութեան Լիբանանի Շրջանային վարչութեան ատենապետ տոքթ. Աւետիս Տագէսեանի, ընկերակցութեամբ գաղութի ազգայիններէն Տիար Ժոզէֆ Կանիմեանի:
Հանդիպման գլխաւոր թեման լիբանանահայութիւնն էր, որուն ներկայ իրավիճակին մասին փոխանակուեցան տեղեկութիւններ եւ արծարծուեցան գաղութը յուզող հոգեւոր, ազգային, մշակութային ու ընկերային հրատապ հարցեր:
Տոքթ. Տագէսեան իր խօսքին մէջ շնորհակալութիւն յայտնեց Առաջնորդ Սրբազան Հօր, ներկայ հանդիպումը որակելով օգտաշատ եւ նպատակասլաց, յատկապէս Լիբանանի հայութեան մարդկային, կրթական եւ բարոյական կարիքները լրացնելու առումով:
Առաջնորդ Սրբազանը եզրափակեց մտերմիկ հանդիպումը լաւատեսութեան երանգով՝ միաժամանակ յոյս յայտնելով, որ երկիր ու ժողովուրդ կը յաջողին դուրս գալ ներկայ ճգնաժամէն, բոլորին պէս լիբանանահայութեան համար եւս կը ստեղծուին ապրելու նպաստաւոր պայմաններ:
