– Հ.Մ.Ը.Մ.-Ի «Ս. ՄԵՍՐՈՊ ՄԱՇՏՈՑ» ՍԿԱՈՒՏԱԿԱՆ ԿՐՕՆԱԿԱՆ ՇՔԱՆՇԱՆԻ ԴԱՍԸՆԹԱՑՔՆԵՐՈՒ ԱՌԹԻՒ ԽԱՉ ԶԱՐԴԱՍԵՂՆԵՐՈՒ ՕՐՀՆՈՒԹԻՒՆ ԵՒ ՓՈԽԱՆՑՈՒՄ
– ՀՈԳԵՀԱՆԳԻՍՏ՝ ՀՕՄ-Ի ՆՆՋԵՑԵԱԼՆԵՐՈՒ ԵՒ ՄԱՐԱՇԻ ԱՂԷՏԻ ԶՈՀԵՐՈՒ ՅԻՇԱՏԱԿԻՆ
Կիրակի, 23 Փետրուար 2020-ը Բուն Բարեկենդան է, իսկ Երկուշաբթի, 24 Փետրուարին կը սկսի Մեծ Պահոց քառասնօրեայ շրջանը։
Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան պիտի հանդիսապետէ Էնսինոյի Ս. Նահատակաց եկեղեցւոյ Ս. Պատարագին եւ պիտի փոխանցէ իր պատգամը։
Ս. Պատարագի ընթացքին, Առաջնորդ Սրբազանը Հ.Մ.Ը.Մ.-ի «Ս. Մեսրոպ Մաշտոց» սկաուտական կրօնական շքանշանի խաչ զարդասեղները պիտի օրհնէ եւ յանձնէ 30 սկուատներուն, որոնք պիտի մասնակցին յատուկ դասընթացքներուն եւ աւարտին պիտի արժանանան կրօնական շքանշանին։
Իսկ Առաջնորդական փոխանորդ Գերշ. Տ. Թորգոմ Եպս. Տօնոյեան պիտի հանդիսապետէ Կլենտէյլի Ս. Աստուածածին եկեղեցւոյ Ս. Պատարագին եւ պիտի ուղղէ իր պատգամը։
ՀՈԳԵՀԱՆԳԻՍՏ
ՀՕՄ-ի Արեւմտեան Միացեալ Նահանգներու Շրջանային Վարչութեան խնդրանքով, եւ Առաջնորդ Սրբազան Հօր տնօրինութեամբ, նոյն օրը, Թեմիս բոլոր եկեղեցիներուն մէջ հոգեհանգստեան պաշտօն պիտի կատարուի ՀՕՄ-ի հին ու նոր ննջեցեալ ծառայողներու եւ բարերարներու հոգիներու խաղաղութեան համար։ Մարաշի աղէտի 100-ամեակին առիթով, հոգեհանգստեան պաշտօն պիտի կատարուի նաեւ զոհերուն ու ինքնապաշտպանութեան հերոսներուն յիշատակին համար։ Իսկ կէսօրէ ետք, ժամը 1:30-ին, Մարաշի Հայրենակցական Միութեան կեդրոնին մէջ, Փասատինա, տեղի պիտի ունենայ հոգեճաշ եւ ոգեկոչում, որուն յանուն Առաջնորդ Սրբազան Հօր պիտի մասնակցի Արժ. Տ. Պօղոս Քհնյ. Պալթայեան։
