Չորեքշաբթի, 15 Մարտ 2023-ի առաւօտեան, Արեւմտեան Թեմի Առաջնորդ՝ Գերշ. Տ. Թորգոմ Ս. Եպս. Տօնոյեան, Մոնթեպելլոյի Ս. Խաչ Մայր տաճարին մէջ նախագահեց Մեծ Պահոց Միջինքի Արեւագալի արարողութեան, իր կողքին ունենալով եկեղեցւոյ Հոգեւոր տեսուչ՝ Գերպ. Տ. Միւռոն Ծ. Վրդ. Ազնիկեանը, Կլենտէյլի Ս. Աստուածածին եկեղեցւոյ Հոգեւոր տեսուչ՝ Հոգշ. Տ. Զարեհ Վրդ. Սարգիսեանը եւ Մայր տաճարի Հոգեւոր հովիւ՝ Արժ. Տ. Աշոտ Քհնյ. Գամպուրեանը:
Հաւատացեալներու շարքին, արարողութեան ներկայ եղան նաեւ եկեղեցւոյ ժողովականութեան, Տիկնանց միութեան անդամներ, Ազգ. Մեսրոպեան վարժարանի 7 եւ 8-րդ կարգի աշակերտներն ու իրենց դաստիարակները։
Իր պատգամը ուղղելով աշակերտութեան, Առաջնորդ Սրբազանը շեշտեց աղօթքի ճամբով հոգիի մաքրութեան եւ ինքնաքննութեան կարեւորութիւնը՝ յորդորելով զանոնք, որ Մեծ Պահքի այս շրջանին ըլլան աւելի զուսպ ու մնան հեռու մեղքէն ու փորձութենէն, ապա հրաւիրեց ներկաները բարութիւն ու սէր տարածելու նաեւ իրենց հարազատներու կեանքին մէջ:
