Չորեքշաբթի, 15 Մարտ 2023-ի կէսօրին, Արեւմտեան Թեմի Առաջնորդ՝ Գերշ. Տ. Թորգոմ Ս. Եպս. Տօնոյեան, այցելեց Օրէնճ Քաունթիի Ազգ. Արի Կիրակոս Մինասեան վարժարան, ընկերակցութեամբ Հոգշ. Տ. Զարեհ Վրդ. Սարգիսեանի:
Դպրոցի մուտքին Առաջնորդ Սրբազանը դիմաւորուեցաւ շրջանի Ս. Քառասնից Մանկանց եկեղեցւոյ Հոգեւոր հովիւ՝ Արժ. Տ. Գարեգին Քհնյ. Պետուրեանի, վարժարանի տնօրէնուհի Տիկին Անի Սարգիսեանի, տեղւոյն Հ.Յ.Դ. Արմէն Գարօ կոմիտէութեան հերթապահ Տիար Կարօ Մատէնլեանի, եկեղեցւոյ Հոգաբարձութեան անդամ Տիար Յակոբ Պատոլեանի, ինչպէս նաեւ դպրոցի Ուսումնական մարմինի ատենապետ՝ Տիար Գօգօ Տէր Դաւիթեանի եւ այլ անդամներու կողմէ:
Առաջնորդ Սրբազանը Ղուկասեան սրահի մուտքին օրհնեց աղն ու հացը, ապա սրահին մէջ ներկայ եղաւ վարժարանի աշակերտներուն կողմէ պատրաստուած գեղարուեստական կոկիկ յայտագիրի մը, որ կ՛ընդգրկէր երգ, արտասանութիւն, թատրոն ու խօսքեր, զորս ան ըմբոշխնեց հիացական ուրախութեամբ:
Այս առիթով արտասանած իր խօսքին մէջ Առաջնորդ Սրբազանը բարձր գնահատեց վարժարանի տնօրէնութիւնը, դաստիարակ ուսուցիչներն ու աշակերտները՝ իրենց բծախնդիր աշխատանքին ու հայեցի մատուցման համար, ապա շրջեցաւ դասարանները եւ մօտէն առնչուեցաւ դպրոցի ներքին կեանքով, փոքրիկ ու պատանի աշակերտներու առօրեայով:
Հուսկ, Թորգոմ Սրբազան արժեւորելով իր շրջագայութիւնը դէպի Օրէնճ Քաունթի՝ դիտել տուաւ, որ շրջանը յատուկ տեղ կը գրաւէ Արեւմտեան Թեմի կեանքին մէջ իր Ս. Քառասնից Մանկանց եկեղեցիով, ժողովականութեամբ, Ազգ. Արի Կիրակոս Մինասեան վարժարանով, աշակերտներով, ծնողներով, միութենական կառոյցներով, բարերարներով, բարեկամներով եւ հայկեան բոլոր զաւակներով:
