Հայ Եկեղեցւոյ առաքելութեան անքակտելի մաս եւ բաժին կը կազմէ զանազան հարցերու պատճառով ոչ բարեբեր հանգամանքներու մէջ յայտնուած մեր ժողովուրդի հատուածը: Այս ծիրէն ներս, Ա.Մ.Ն. Արեւմտեան Թեմի Ազգային վարչութեան Կրօնական ժողովը, Առաջնորդ՝ Գերշ. Տ. Թորգոմ Ս. Եպս. Տօնոյեանի գլխաւորութեամբ, տարբեր առիթներով կը ծրագրէ տեսակ-տեսակ ձեռնարկներ, որպէսզի առաւելագոյն չափով հասանելի դառնայ նաեւ հոգեւոր սնունդի կարօտ հայ բանտարկեալներու:
Արդարեւ, Առաջնորդ Սրբազան Հօր հովանիին տակ Թեմի Քահանայ հայրեր, ղեկավարութեամբ Բարշ. Ռաֆֆի Սրկ. Կարապետեանի, կանոնաւոր կերպով հոգեւոր մատակարարութիւն կը բերեն՝ այցելելով բանտեր:
Առաջնորդ Սրբազան Հօր մտայղացումով եւ Ազգային Առաջնորդարանի հրակատարակութեամբ, ինչպէս նաեւ բարերարութեամբ Տիկին Յասմիկ Յովակիմեանի, այսօր, 21 Նոյեմբեր 2023-ին, լոյսին եկաւ երկլեզու եւ իր տեսակին մէջ եզակի աղօթագիրք մը՝ «Բանտարկեալին աղօթագիրքը», որ իր մէջ կ՛ամփոփէ նոր գրի առնուած կամ հին ժամանակներէ եկած զանազան աղօթքներ՝ առ ի մխիթարութիւն հայ բանտարկեալներու եւ բարիին մէջ ինքնահաստատում՝ կամայ թէ ակամայ բոլոր սայթաքողներու:
