Ամերիկայի Միացեալ Նահանգներու Հիմնադրման 250-Ամեակին Առիթով, Ամերիկայի Միացեալ Նահանգներու Հայ Համայնքներու Առաջնորդներ Շնորհաւորական Այցելութիւն Տուին Սպիտակ Տուն

Չորեքշաբթի, 16 Սեպտեմբեր 2026-ի կէսօրին, Արեւմտեան Թեմի Առաջնորդ՝ Գերշ. Տ. Գեղամ Ս. Արք. Խաչերեան եւ Արեւելեան Թեմի Առաջնորդ՝ Գերշ. Տ. Անուշաւանդ Ս. Արք. Դանիէլեան, Մեծի Տանն Կիլիկիոյ Կաթողիկոսութեան գահակալ՝ Ն.Ս.Օ.Տ.Տ. Արամ Ա. Վեհափառ Հայրապետի օրհնութեամբ մաս կազմեցին ամերիկահայ համայնքներու Հոգեւոր առաջնորդներու պատուիրակութեան, որ Ամերիկայի Միացեալ Նահանգներու հիմնադրութեան 250-ամեակին առիթով շնորհաւորական այցելութեամբ ուղղուեցաւ Ուաշինկթընի Սպիտակ Տուն եւ հիւրընկալուեցաւ Ա.Մ.Ն. վսեմաշուք նախագահ Տանըլտ Թրամփի կողմէ, նախագահական ձուաձեւ գրասենեակին մէջ:

Շնորհաւորական այս այցելութիւնը նախաձեռնութիւնն էր Միացեալ Նահանգներու մէջ Հ.Հ. դեսպան Նարեկ Մկրտչեանի, գործակցութեամբ Սպիտակ Տան Հաւատքի գրասենեակի պատասխանատու, նախագահի երկարամեայ Հոգեւոր հովիւ` Փաուլա Ուայթ-Քէյնի եւ Սպիտակ Տան Հաւատքի գրասենեակի տնօրէնուհի՝ Ճենիֆըր Ս. Քորնի:

Հայկական պատուիրակութեան միւս անդամներն էին՝ Հ.Հ. Դեսպան Նարեկ Մկրտչեան, Հայ Եկեղեցւոյ էջմիածնական Թեմի Ա.Մ.Ն. Արեւմտեան եւ Արեւելեան համայնքներու առաջնորդներ՝ Գերշ. Տ. Յովնան Արք. Տէրտէրեան եւ Գերշ. Տ. Մեսրոպ Եպս. Պարսամեան, Հիւսիսային Ամերիկայի եւ Գանատայի Հայ Կաթողիկէ առաջնորդ՝ Արհ. Տ. Միքայէլ Եպս. Մուրատեան, Հիւսիսային Ամերիկայի Հայ Աւետարանական Միութեան աւագ հովիւ՝ Վերապատուելի Հենրիկ Շահնազարեան:

Նախագահ Թրամփի հետ տեղի ունեցած պատմական այս հանդիպումը նաեւ ներկայացուցչական երկու հանգամանք ունէր: Առաջինը այն, որ Հայաստան իբրեւ աշխարհի քրիստոնեայ առաջին պետութիւն, դարերով պահած է քրիստոնէական հոգեւոր արժէքները եւ ամուր կառչած քրիստոնէական հաւատքին, հակառակ դարերով ապրած քաղաքական վերիվայրումներու, իսկ երկրորդը՝ ներ-ամերիկեան ճակատի վրայ, այս երկրի հայ քրիստոնեայ համայնքներու եւ անոնց Հոգեւոր առաջնորդներու խաղացած դերը Ամերիկայի մէջ քրիստոնէական հաւատքի ամուր պահպանման, ուսուցման, աւանդութիւններու շարունակականութեան եւ քրիստոնէական ոգեղէն սկզբունքներու եւ գիտելիքներու տարածման գործին մէջ:

Ամերիկայի Միացեալ Նահանգներու հիմնադրութեան 250-րդ տարեդարձին առիթով, հայ հոգեւոր առաջնորդներու պատուիրակութիւնը իր ջերմ շնորհաւորանքներն ու բարեմաղթութիւնները փոխանցեց նախագահ Թրամփի, ապա եկեղեցական կարգով իբրեւ աւագ Արքեպիսկոպոս Յովնան Սրբազան Տէրտէրեանի գլխաւորութեամբ կատարեց հաւաքական աղօթք եւ Աստուծմէ խնդրեց՝ Հայաստանի եւ Ամերիկայի եւ իրենց ժողովուրդներու խաղաղ ու ապահով կեցութիւն, աշխարհի վրայ խաղաղութեան հաստատում, մարդկային իրաւունքներու պաշտպանութիւն: Նախագահին հետ հայ պատուիրակութեան հանդիպման նաեւ ներկայ եղան Սպիտակ Տան Հաւատքի գրասենեակի պատասխանատուները:

Նշենք նաեւ, որ նախագահ Թրամփի հետ հանդիպումէն առաջ, հայ պատուիրակութիւնը տեսակցութիւն ունեցաւ նախագահի անմիջական հովանաւորութիւնը վայելող Սպիտակ Տան Հաւատքի գրասենեակի զոյգ պատասխանատուներուն հետ, որոնք անդրադարձան բազմամշակութային այս երկրին մէջ քրիստոնէական հաւատքի պահպանման կարեւորութեան եւ ձեւերուն մասին, ապա յոյս յայտնեցին, որ հայ համայնքներու Հոգեւոր առաջնորդները եւս անվհատ կը շարունակեն իրենց հովուական առաքելութիւնը, ամերիկահայ համայնքներու կեանքէն ներս: